කැලුම් සේනානායක නැමති වෘක පෝතක බාලදක්ෂයා

කැලුම් සේනානායක සිය වෘත්තිය ජීවිතය ආරම්භ කරන්නේ පෞද්ගලීකරණයට පෙර ජාතික රක්ෂණ සංස්ථාවේ ප්‍රධාන නියෝජිතයා වූ මර්කන්ටයිල් ක්‍රෙඩිට් සමාගමට ලිපිකරුවකු ලෙස එක්වීමෙනි. අනතුරුව පියවරෙන් පියවර උසස්වීම් ලබමින් විවිධ ආයතනවල සේවය කරන ඔහු අද රක්ෂණ ක්ෂේත්‍රයේ ප්‍රාමාණිකයෙකි. වත්මනෙහි ARPICO INSURANCE PLC හි ප්‍රධාන විධායක නිලධාරීවරයා ලෙස කටයුතු කරන කැලුම් සේනානායක මෙරට රක්ෂණ සමාගමක ප්‍රධාන විධායක නිලධාරී තනතුරකට පත් ප්‍රථම MDRT සම්මානලාභියා ද වෙයි. 

කොළඹ ආනන්ද විද්‍යාලයේ කිර්තිමත් ආදි ශිෂ්‍යයකු වන ඔහු ව්‍යාපාර කළමනාකරණය පිළිබඳ ඩිප්ලෝමාවක් සහ ඕස්ට්‍රේලියාවේ University of Western Sydney වෙතින් ව්‍යාපාර පරිපාලන පශ්චාත් උපාධියක් ද (MBA) හිමිකරගෙන තිබේ. සිය ජීවන මඟ සකස් කරගත් ආකාරය ගැන හේ සිය දිවිසැරියේ නිදර්ශන ඇසුරෙන් සිළුමිණ සමඟ කළ සාකච්ඡාවයි මේ. 

 

- මගේ ගමන පටන් ගත්තේ ලිපිකරු රැකියාවෙන්

- මාත් එක්කම ලිපිකරු වෘත්තියට ආ අය, එහෙමත් නැත්නම් මට වඩා වසර කිහිපයක් ප්‍රවීණව සිටි අය එක තැන හිර වුණා; නැත්නම් නැවතුණා 

- අර්ජුන තමයි මුලින් ම ආවෙ මර්කන්ටයිල් ක්‍රෙඩිට් එකට. ඊට මාසෙකට පස්සෙ අර්ජුන මාවත් ගත්තා 

- ලංකාවේ දින 133ක් ඇතුළත MDRT කරලා සම්මානය අරන් ප්‍රධාන විධායක නිලධාරියා වූ පළමු වැන්නා මම

 

ඔබ කවදාද, කොහේද ඉපදුණේ-

ජූලි 30 දා කොළඹදී

භාවිත කරන්නේ ඔබේ සම්පූර්ණ නම ද

මගේ සම්පූර්ණ නම නන්එදිරි තේජා කැලුම් මැග්ලියන් සේනානායක. හැබැයි හැමෝම දන්නෙ කැලුම් සේනානායක කියලා.

මොකද්ද ඔබේ පියාගේ නම?

කුමාරතිලක සේනානායක; ඔහු වාරිමාර්ග තාක්ෂණික නිලධාරියෙක්.

මව රැකියාවක් කළාද; කුමක්ද ඇගේ නම?

සෙව්ජිනියා සේනානායක; අම්මා කොළඹ ආනන්ද විද්‍යාලයේ හිටපු ඉංග්‍රීසි ගුරුවරියක්

ඔබ පාසල් ගියේ...

පළමු වසරේ සිටම කොළඹ ආනන්ද විද්‍යාලයට ගියේ

පාසල් කාලේ ක්‍රීඩාවට යොමු වෙලා හිටියද?

ඔව්, මම හොකී කළා, පිහිනුම් ඉසව් කළා. මලල ක්‍රීඩා කළා. ගොඩක් ක්‍රීඩාව පැත්තට නැඹුරුවක් තිබුණු කෙනෙක් මම

කොහොමද ඔබේ උසස් අධ්‍යාපන කටයුතු සිදු වෙන්නේ?

ව්‍යාපාර කළමනාකාරීත්වය පිළිබඳ ඩිප්ලෝමාවක් මම ලබා ගත්තා. අනතුරුව ඔස්ට්‍රේලියාවේ සිඩ්නි විශ්වවිද්‍යාලයෙන් ව්‍යාපාර කළමනාකරණය පිළිබඳ පශ්චාත් උපාධියක් ලබා ගත්තා

ඔබේ වෘත්තිය ජීවිතය පටන් ගන්නේ මර්කන්ටයිල් ආයතනයේ ලිපිකරුවෙක් විදියට. අපි යමුද ඒ පටන් ගත් තැනට

ඇත්තටම ඒ අතීතය හරිම සුන්දරයි. 1982 ඔක්තෝබර් 14 වැනිදා තමයි මම මර්කන්ටයිල් ක්‍රෙඩිට් ආයතනයේ රක්ෂණ දෙපාර්තුමේන්තුවට මම සම්බන්ධ වෙන්නේ. ඔබ කිව්වා හරි ඒ ලිපිකරුවෙක් විදියට. එදා මගේ පඩිය රුපියල් හත්සිය පහළොවයි.

කුඩා කාලයේ සිහින මැව්වෙ කවුරු වෙන්නද?
මම පාසල් යන කාලේ යුද හමුදා ජ්‍යේෂ්ඨ ශිෂ්‍ය භටයෙක්. ඒ වගේම වෘක පෝතක කණ්ඩායමේ නායකයා. ඒ වගේම පාසලේ ශිෂ්‍ය නායකයෙක්. මේවත් එක්ක මගේ හිතේ තිබුණෙ එක ම අරමුණයි. ඒ තමයි යුද හමුදාවට බැඳෙන එක.

ඒ බාහිර ක්‍රියාකාරකම් පමණද ඔබට බලපෑවේ හමුදා සිහිනය ඇති වෙන්න

ඇත්තටම ඒකට පාසලේ වටපිටාවත් බලපෑවා. කොළඹ ආනන්දය කියන්නේ රටට හමුදා නිලධාරීන් විශාල ප්‍රමාණයක් දායාද කළ පාසලක්. යුද්ධය පවතිද්දි ඒ සඳහා නායකත්වය දෙන ප්‍රමුඛ පෙළේ නිලධාරීන් බොහෝ ප්‍රමාණයක් බිහි කළේ ආනන්දය. මගේ පාසල් ජීවිතේ පළමු විදුහල්පති කර්නල් පේරුසිංහ. දෙවැනි විදුහල්පති කර්නල් රාජපක්ෂ. තුන්වැනි විදුහල්පතිවරයා වුණේ කර්නල් කුඩලිගම. මුළු පාසල් කාලෙම මම හිටියේ කර්නල්වරුන් වුණු විදුහල්පතිවරුන් යටතේ. මමත් ක්‍රීඩා කළ කෙනෙක්. ඒ නිසා වෙන්න ඇති මට තිබුණු එක ම සිහිනය වුණේ හමුදාවට බැඳෙන එක

හැබැයි අද ඔබ ඒ සිහිනය සැබෑ කරගත් කෙනෙක් විදියට නොවෙයි මට මුණ ගැසෙන්නේ. මොකද්ද සිද්ධ වුණේ පාර වෙනස් වෙන්න

මම යුද හමුදාවට බැඳෙන්න ඔක්කොම කරලා තේරිලා ඉද්දි මට ඒ ගමන යන්න බැරි වෙන දෙයක් වුණා.

ඔබේ සිහිනය අමතක කරන්න තරම් බලවත් වුණු ඒ සිද්ධිය මොකද්ද?

මගේ අම්මා තමයි මගේ ජීවිතේ වීරයා. මම හමුදාවට යන්න හදද්දි අම්මා මට යන්න එපා කියලා ඇඩුවා. මම පවුලේ බාලයා. මට ඉන්නෙ අයියයි, අක්කයි. මාව වදපු හදපු අම්මගෙ ඉල්ලීම මට මඟ හරින්න බැහැ. ඉතින් මම තීරණයක් ගත්තා.

අම්මට කිව්වෙ නැද්ද කලින් ඔබේ සිහිනය ගැන?

මම කලින් කිව්වා. මම විශ්වවිද්‍යාලයට යන්නෙ නැහැ; කෙලින් ම හමුදාවට යනවා කියලා මම අම්මට කියලා තිබුණෙ. ඒත් ඒ තීරණාත්මක මොහොතෙදි මට අම්මගෙ ඉල්ලීම අහක දාන්න බැරි වුණා.

කඩන් වැටුණු තව සිහින තියෙනවද ඔබේ ජීවිතේ?

මම සිහින මැවූ දේවල් අතරෙන් මට ඉටු කරගන්න බැරි වුණු එක ම සිහිනය හමුදා සිහිනය පමණයි. ඒ සිහිනය වුණත් මම අතහැරියේ ඒ මාව වදපු හදපු අම්මා නිසා

එතකොට රක්ෂණ ක්ෂේත්‍රයට ඔබ කොහොමද එන්නෙ

ඇත්තට ම ඒක අහම්බයක්. මම ඒ වෙනකොට ඉන්ෂුවරන්ස් ගැන කිසිම දෙයක් දැනගෙන හිටියෙ නැහැ.

ඇයි රක්ෂණ ක්ෂේත්‍රය ම තෝරා ගන්නේ.

මමයි අර්ජුන රණතුංගයි එක ම පන්තියේ. මගේ අම්මයි අර්ජුනගෙ අම්මයි දෙන්න ම ඉගැන්වුවෙ කොළඹ ආනන්දෙ; ඒ දෙන්නත් හොඳ ම යාළුවො. අර්ජුන තමයි මුලින් ම ආවෙ මර්කන්ටයිල් ක්‍රෙඩිට් එකට. ඊට මාසෙකට පස්සෙ අර්ජුන මාවත් ගත්තා.

ඔබ නොදන්නා රක්ෂණ ක්ෂේත්‍රයට ආදරය කරන්න පටන් ගන්නෙ...

ඒ කාලේ අපේ අධ්‍යක්ෂවරයෙක් හිටියා පද්මා ගුණසේකර කියලා. එතුමා තමයි මට රක්ණයේ අයන්න ආයන්න කියලා දුන්නු ගුරුතුමා. එතුමා නිසා තමයි මම මේ ක්ෂේත්‍රයට ආදරය කරන්න හුරු වුණේ. අතීතය අමතක කරන්නවත්, කෘතගුණ සැලකීම නොතකා හරින්නවත් මට බැහැ.

මේ ක්ෂේත්‍රයට එන ඔබ දීර්ඝ ගමනක් යනවා. කොහොමද ඒ වෙනුවෙන් පාර විවර වෙන්නේ.

මර්කන්ටයිල් ආයතනයේ ලිපිකරුවෙක් විදියට පටන් ගත්ත මගේ ජීවිතේ අවුරුදු තුනකට පස්සෙ මම උසස්වීමක් ලබනවා විධායක නිලධාරියෙක් හැටියට. තව අවුරුදු තුනකට පස්සෙ සහකාර කළමනාකාරවරයෙක් හැටියටත්, ඊටත් පස්සෙ වැඩ බලන කළමනාකාරවරයෙක් හැටියටත් උසස්වීම් ලබනවා. අනතුරුව කළමනාකාරවරයෙක්, ජ්‍යේෂ්ඨ කළමනාකාරවරයෙක් හැටියටත් මම පත් වෙනවා. ඊට පස්සෙ මම අවුරුදු නවයක් කටයුතු කරන්නෙ සහකාර සාමාන්‍යාධිකාරීවරයෙක් හැටියටයි. එතැනිනුත් පස්සෙ සාමාන්‍යාධිකාරීවරයකු බවට පත්වෙනවා. ඊටපස්සෙ මම අධ්‍යක්ෂවරයෙක් විදියට පත්වෙලා දැන් මම ප්‍රධාන විධායක නිලධාරීවරයා ලෙස කටයුතු කරනවා.

මේ අතරේ ඔබ යූනියන් ඇෂුවරන්ස් සමාගමට සම්බන්ධ වෙනවා. කොහොමද මේක වෙන්නෙ

මම වැඩ කළේ මර්කන්ටයිල් ක්‍රෙඩිට් සමාගමේ රක්ෂණ දෙපාර්තමේන්තුවේ. අපි ජාතික රක්ෂණ සමාගමේ ප්‍රධාන නියෝජිත. මම මෙහෙම ඉන්නකොට මර්කන්ටයිල් සමාගමේ සභාපතිවරයා වුණු ජයවර්ධන මහත්මයා හැදුවා යූනියන් ඇෂුවරන්ස් සමාගම. එතුමා තමයි නිර්මාතෘ. එතකොට මර්කන්ටයිල් රක්ෂණ දෙපාර්තමේන්තුවේ හිටපු සියලු ම සේවකයන් යූනියන් ඇෂුවරන්ස් සමාගමට අනුයුක්ත කළා. එතැන් ඉඳන් මම අවුරුදු 27ක් යූනියන් ඇෂුවරන්ස් සමාගෙමේ වැඩ කරනවා. එතැන මම අවසාන වශයෙන් සිටියේ සහකාර සාමාන්‍යාධිකාරිවරයෙක් විදියට.

සාමාන්‍යාධිකාරීවරයකු වශයෙන් පත්වෙද්දි ඔබේ වයස කීයද?

එතකොට වයස අවුරුදු 46 යි.

ඔබ ඉදිරියට යන්නට පටන් ගන්නේ යූනියන් ඇෂුවරන්ස් සමාගම හා සම්බන්ධ වුණාට පස්සෙ ඉඳන්...

මෙහෙමයි. මර්කන්ටයිල් ආයතනයේ මම වැඩ කළේ ලිපිකරුවකු හා විධායක නිලධාරියකු හැටියට. ඊට පස්සෙ යූනියන් ඇෂුවරන්ස් සමාගමේ සහකාර කළමනාකාර තනතුරේ ඉඳන් සහකාර සාමාන්‍යාකාරීවරයකු වෙනකම් හිටියා.

මේ අතරෙ ඊගල් රක්ෂණ සමාගමට සම්බන්ධ වෙනවා?

ඇත්තට ම එතැන සිද්ධ වුණේ ඊගල් රක්ෂණ සමාගමෙන් ආරාධනාවක් ලැබෙනවා සාමාන්‍යාධිකාරීවරයකු වශයෙන් සම්බන්ධ වෙන්න කියලා. 2009 දි මම ඒ අනුව යනවා ඊගල් රක්ෂණ සමාගමට. AIA රක්ෂණ සමාගම විසින් ඊගල් රක්ෂණ සමාගම මිලදී ගත්තා. එහිදී මට උසස්වීමක් ලැබෙනවා මෙහෙයුම් අධ්‍යක්ෂවරයා විදියට. අවුරුදු 11ක් AIA රක්ෂණ සමාගමේ මම වැඩ කළා.

අතරමැදදි ඔබ AIA රක්ෂණ සමාගමෙන් ඉවත් වෙනවා. ඒ තවත් සිහිනයක් හඹා යන්න...

ඔව්, මට තිබුණා සිහිනයක්. ඒ තමයි රක්ෂණ නියෝජිතයන්ට ලෝකයේ තියෙන ඉහළ ම සම්මානය තමයි MDRT එහෙමත් නැත්නම් මිලියන් ඩොලර් රවුන්ඩ් ටේබල් කියන සම්මානය. මගේ අතින් මේ සම්මානලාභීන් දහස් ගණනක් බිහිවෙලා තියෙනවා. එහෙම වෙන්න මම ගොඩක් අතහිත දීලා උදව් කරලා තියෙනවා. අවුරුදු විස්සක් විසිපහක් තිස්සේ මට තිබුණා ලොකු සිහිනයක්; රක්ෂණ අලෙවිකරුවකුට ලැබෙන ඉහළ ම සම්මානය මටත් ලබා ගන්න. මට ඕන කමක් තිබුණෙ නෑ නිලධාරියෙක් හැටියට ඒ සම්මානය ගන්න. 2020 අවුරුද්දෙදි මම ඒකෙන් ජයග්‍රහණය කළා.

එතකොට ඔබ AIA රක්ෂණ සමාගමේ අධ්‍යක්ෂවරයෙක්. කොහොමද නිලධාරියකු නොවී මේ සම්මානය ගත්තෙ.

මම මගේ අධ්‍යක්ෂ ධූරයෙන් ඉවත් වුණා. AIA රක්ෂණ සමාගමට ම මම රක්ෂණ අලෙවිකරුවකු ලෙස වැඩ කළා. මම සම්මානය ගත්තෙ දවස් 133කින්. ලංකාවේ දින 133ක් ඇතුළත MDRT කරලා සම්මානය අරන් ප්‍රධාන විධායක නිලධාරියා බවට පත් වූ පළමු වැන්නා මම.

ඔබ එනවා පියවරෙන් පියවර ඉදිරියට. ඇයි අපි මුලින් පටන් ගන්න ඕන

මම හැම තනතුරක ම වැඩ කරලා තියෙනවා. ඒ නිසා හැම සේවකයෙක්ගෙම හද ගැහෙන රාවය මම හොඳින් හඳුනනවා. සේවකයකුට ඇවිත් මට බොරුවක් කියන්න හරි, කරන්න හරි බැහැ. එතකොට මාව රවට්ටන්න බැහැ. දන්නෙ නැති කෙනෙක් මේ තත්ත්වයට එකපාර ආවම එයා දන්නෙ නෑ මේ වැඩ කටයුතු කෙරෙන විදිය. නායකයෙක් විදියට තමන්ගෙ විෂය ගැන පුළුල් දැනුමක් තියෙන්න ඕන. සේවකයන් ගැන බලන්න, ආයතනය දියුණු කරන්න මේ සියල්ල කරන්න පුළුවන් වෙන්නේ විෂය දැනුම පුළුල් නම් පමණයි.

මොකද්ද මේ ක්‍රමවේදය

මම හරි ක්‍රමවේදයකට වැඩ කරන කෙනෙක්. මට පිළිවෙළට වැඩ ඕන. ඒ වගේම මම සිහින හඹා යන්නෙක්. ඒ සිහින සැබෑ කරගන්න මම මහන්සියෙන් වැඩ කරනවා.

දියුණු වෙන කෙනකුට ඔබ යෝජනා කරන ගමන් මාර්ගය එහෙමත් නැත්නම් වගා කරගත යුතු ගතිගුණ මොනවාද?

අවංක වීම තමයි පළමු වැනි එක. වැරදි මාර්ගවලින් සල්ලි හම්බු කරන්න හොඳ නෑ. සාමාන්‍ය සේවකයකු නොවී අත්‍යවශ්‍ය සේවකයකු වීම ඉතා වැදගත්. තමන් කරන දේ ගැන හොඳට හදාරන්න ඕන. හැදෑරීම නිසා වැරදි තීරණ ගැනෙන්නෙ නෑ. ඕනෑ ම කෙනකුට දියුණු වෙන්න පිපාසාවක් තියෙන්න ඕන. සිහින තියෙන්නත් ඕන; ඒ සිහින ඉෂ්ඨ කරගන්න ක්‍රියාපටිපාටියක් තියෙන්නත් අවශ්‍යයයි. ඒ වගේම තීරණ ගන්න බය වෙන්න හොඳ නැහැ. වෙනස් වීම් කරන්න පැකිලෙන්න හොඳ නැහැ. තාක්ෂණික දේවල් ගැන දැනුම්වත් වෙන්න ඕන. ඒවායේ යාවත්කාලීන වීම් අධ්‍යයනය කිරීම වැදගත්. මේ දේවල් දියුණු වෙන කෙනකුට අත්‍යවශ්‍යයයි.

මේ වෙනුවෙන් මොනවද ජීවිතේ කැප කළ දේවල්...

මගේ MDRT සම්මානය ගන්න මම අධ්‍යක්ෂ ධූරයකට සමු දුන්නා. මට මගේ නිවාඩු කාල අහිමි වුණා. මගේ පවුලේ සාමාජිකයන් සමඟ ගනුදෙනු කරන්න තියෙන කාලය අහිමි වුණා. මම බිරියත් එක්ක කතා කරලා ඒවා ලස්සනට කළමනාකරණය කරගත්තා. දරුවො ලොකු වෙද්දි මම එයාලා එක්ක ගත කරන්න තියෙන කාලය අඩුකරලා රැකියාව වෙනුවෙන් කාලය යෙදෙව්වා. ආයතන දියුණු කරන්න මම දිවා රෑ නොබලා වෙහෙසුණා. මගේ ජීවිතයේ මට එක වුණේ රාජකාරිය. මම මගේ රාජකාරියට රැයක් දවාලක්, සෙනසුරාදාවක්, ඉරිදාවක්, පෝයක් බාධාවක් කරගෙන නෑ. ජීවිතේ ජයගන්න නම් ලැබෙන පඩියට වඩා වැඩ කරන්න ඕන. එහෙම කළාම සොබාදහම පවා අපට ආශීර්වාද කරනවා. කිසිම දවසක මම මගේ සිහින කැප කරලා නෑ. හැබැයි ඒ සිහින ඉෂ්ඨ කරගන්න ගොඩක් දේවල් කැප කරලා තියෙනවා.

මේ ශක්තිය ලැබෙන්නෙ කොහෙන්ද

මගේ අම්මා දීර්ඝ කාලයක් ආනන්දෙ කොල්ලන්ට ඉංග්‍රීසි උගන්නපු යකඩ ගැහැනියක්. අම්මා මම පළවෙනියට රැකියාවට යන දවසෙ කියපු දෙයක් තමයි, ‘පුතේ උඹ සමාගමට වටිනාකමක් ඇතිකරන කෙනෙක් වෙයන්‘ කියන එක. මාත් එක්කම ලිපිකරු වෘත්තියට ආ අය, එහෙමත් නැත්නම් මට වඩා වසර කිහිපයක් ප්‍රවීණ ව සිටි අය එක තැනින් හිර වුණා; නැත්නම් නැවතුණා. මම ආයතනයට වටිනාකමක් එකතු කළ අයෙක් වීම නිසා තමයි මම ඉදිරියට ආවෙ. ඒ වගේම මට වැඩක් පටන් ගත්තොත් ඒක ඉවර කරනකම් නවත්තන්න බැරි පුරුද්දක් තියෙනවා. මම ඒකෙන් ආශ්වාදයක් විඳිනවා. ඒක පඩියක් ලැබුණත් නැතත් මම ආසාවෙන් කරන දෙයක්. ආත්ම තෘප්තිය හරි වැදගත්. ඒ නිසා මට සොබාදහමෙන් ආශීර්වාදය ලැබෙනවා.

සේවකයන් සමඟ ඔබ කටයුතු කරන්නේ කොහොමද?

එක එක අය දක්ෂ එක එක දේවල්වලට. ඒවා හඳුනාගෙන මම ඒ අයට වඩාත් හොඳින් කරන්න පුළුවන් දේ පවරනවා. එතකොට ආයතනික වශයෙන් අපට හොඳ ප්‍රතිලාභ ලැබෙනවා; ඒ වගේම සේවකයනුත් වැඩ කරන්නේ සතුටෙන්. අපි හැමෝටම උපදිනකොට ම යම් හැකියාවක් ලැබෙනවා. ගොඩක් අය මේක හංගා ගන්නවා. නායකයකු වශයෙන් අපි දැන ගන්න ඕන ඒ හැකියාව ඇදලා එළියට ගන්න. අවුරුදු 40ක සේවාකාලය ඇතුළත මගේ අතින් බිහි වුණු දක්ෂයන් අපමණයි. එක ම දේ අපි හඳුනා ගන්න ඕන ඔවුන්ගේ දක්ෂතා.

මොන බාධක ආවත් ඉදිරියට යන්න සේවකයන් දිරිමත් කරන්නේ කොහොම ද?

ඉදිරියට යන අයට බාධක වැඩියි. අපි අරමුණුවලට යද්දී බාධක ඇතිවීම ස්වභාවිකයි. පද හදනවා. නැති චෝදනා කරනවා. ඒ කිසිවක් සිතට ගත යුතු නෑ අපි හරි නම්. එවැනි දේ ජීවිතයට පන්නරයක් කරගත යුතුයි. එවිටයි සිහින සැබෑ වෙන්නේ. අපේ සිහින අපි දියුණු කරන්න නම් කැපවීම කරන්න අවශ්‍යයයි. ඒ නිසා කොනිතත්දි, කකුලෙන් අදිද්දී, වඩාත් ශක්තිමත් විය යුතුයි.

කොහොමද පෞද්ගලික ජීවිතේ.

විවාහ වෙන්නේ කොයි කාලෙද?

මම විවාහ වෙන්නේ 1989 වසරේ. ඒ වසර 8ක පෙම් සබඳතාවකින් පසුව. ඇය භද්‍රා සේනානායක. අපිට දරුවන් දෙන්නෙක් ඉන්නවා. දුව තාහරා සේනානායක, පුතා ලිලාන් සේනානායක. මගේ බිරිය මට රාජකාරී ජීවිතේදී විශාල හයියක්. ඇය මට රාජකාරියට දෙන නිදහස තමයි මගේ සාර්ථකත්වයේ රහස. දුවයි පුතයි වැඩ කරන්නෙත් මේ ක්ෂේත්‍රයේමයි. දියණිය විවාහකයි. බෑනා මියුරු. ඔහුත් රක්ෂණ ක්ෂේත්‍රයේ වැඩකරනවා. අපි ඇත්තටම රක්ෂණ පවුලක්. මගේ දුවට පොඩි පුතෙකුත් ඉන්නවා.

නිදහස් වෙලාවට මොකද කරන්නෙ?

මම ගොඩක් කැමැතියි ගෙදර කට්ටිය එක්ක කාලය ගත කරන්න. ඒවගේම පීනන්න මම හරි කැමතියි. මිත්‍රයො එක්ක ගත කරන්නත් කැමතියි.

පොත් කියවනවද?

මට පොත් කියෙවෙනවා නම් අඩුයි; ගොඩක් කාර්යබහුල නිසා. ඒත් මම රෑට අන්තර්ජාලයට ගිහින් මට අවශ්‍ය තොරතුරු සොයනවා. ඒවා ගැන යාවත්කාලීන වෙනවා. අද ලෝකය ම අපි ගාව තියෙනවා; අන්තර්ජාලය නිසා.

සාමාන්‍යයෙන් සංචාරය කරන්න කැමැති කොහේද?

කැලෑවලට යන්නයි කැමති. සොබාදහම එක්ක ළඟින් ඇසුරු කරන්න මම නිතරම උත්සාහ කරනවා. රටවල් 21 කට විතර මම ගිහින් තියෙනවා. ඒත් ලංකාව තරම් ලස්සන රටක් වෙන කොහේවත් නෑ. කොයිතරම් ලස්සන තැන් තියෙනවාද ලංකාවේ. ඒ වගේ තැන්වලට යන්න හරි කැමතියි.

පාවිච්චි කරන්න කැමැති බ්‍රෑන්ඩඩ් දේවල්ද?

මෙහෙමයි. මට හීන තිබුණානෙ. ලිපිකරුවෙක් විදියට වැඩ පටන් ගනිද්දි මට ලොකු හීනයක් තිබුණා, කවදහරි BMW කාර් එකක් ගන්න ඕන කියලා. මගේ පළවෙනි කාර් එක අම්මා අරන් දුන්නු ෆොක්ස්වැගන් එකක්. ඒක පාවිච්චි කරන ගමන් මගේ හීනෙ තිබුණෙ BMW කාර් එකකට. අද ඒ හීනය හරි. ඇඳුම්වලත් මම ආස බ්‍රෑන්ඩ් තියෙනවා. ඒවා රටවලට ගියාම මම ගන්වනවා. විශේෂයෙන් ම පෑන සහ ෂර්ට් එක බ්‍රෑන්ඩඩ් පාවිච්චි කරන්න මම ආසයි.

ආර්පිකෝ රක්ෂණ සමාගමේ ප්‍රධාන විධායක නිලධාරී ආචාර්ය කැලුම් සේනානායක මහතා, විධායක අධ්‍යක්ෂ ධූරයට පත්කෙරෙයි

ආර්පිකෝ රක්ෂණ සමාගමේ ප්‍රධාන විධායක නිලධාරී සහ මෙරට රක්ෂණ ක්ෂේත්‍රයේ කීර්තිමත් වෘත්තිකයෙකු වන ආචාර්ය කැලුම් සේනානායක මහතා එම සමාගමේ, ස්වාධීන නොවන විධායක අධ්‍යක්ෂවරයෙකු ලෙස පසුගියදා පත්කෙරුණි. ඒ,  ශ්‍රී ලංකා රක්ෂණ නියාමන කොමිෂන් සභාවේ ද අනුමැතිය සමඟිනි.

ආචාර්ය සේනානායක, 2021 මාර්තු මාසයේදී ආර්පිකෝ රක්ෂණ සමාගමේ ප්‍රධාන විධායක නිලධාරී ධූරයට පත්වූ අතර, ඔහුට රක්ෂණ ක්ෂේත්‍රයේ වසර 40කට වැඩි අත්දැකීම් ඇත. රක්ෂණ වෘත්තීකයෙකු ලෙස MDRT (Million Dollar Round Table) සන්ධිස්ථානය ශ්‍රී ලංකාව තුල දින 133කින් ළඟාකරගත් ඒ මහතා, මෙරට රක්ෂණ කර්මාන්තය තුළ MDRT සන්ධිස්ථානය මෙලෙස ළඟාකරගත් පළමු සහ එකම ප්‍රධාන විධායක නිලධාරීවරයා වීම ද විශේෂත්වයකි. ආර්පිකෝ රක්ෂණ සමාගමේ විධායක අධ්‍යක්ෂ සහ ප්‍රධාන විධායක නිලධාරී තනතුරුවලට අමතරව එම මහතා, රිචඩ් පීරිස් ඩ්‍රිස්ට්‍රිබියුටර්ස් (Richard Peiris Distributors) සහ රිචඩ් පීරිස් ෆයිනෑන්ස් (Richard Peiris Finance Company) යන සමාගම්වල ද අධ්‍යක්ෂවරයෙකු ලෙස කටයුතු කරයි.

ජාතික රක්ෂණ සංස්ථාවේ ප්‍රධාන නියෝජිත සමාගම වූ මර්කන්ටයිල් ක්‍රෙඩිට් සමාගමෙන් වර්ෂ 1982දී තම රක්ෂණ වෘත්තීය ආරම්භ කළ ආචාර්ය සේනානායක, අනතුරුව යූනියන් ඇෂුවරන්ස් සමාගමේ වසර 27කට වැඩි කාලයක් සේවය කළේය. ඔහු එහිදී සහකාර සාමාන්‍යාධිකාරී ධූරය දක්වා උසස්වීම් ලබාගැනීමට ද සමත් විය. පසුකාලීනව සාමාන්‍යාධිකාරී- මෙහෙයුම් ලෙස AIA ඉන්ෂුවරන්ස් සමාගම සමඟ එක්වුණු ඒ මහතා, දශකයකට වැඩි එම සේවා කාලය තුළ අධ්‍යක්ෂ- මෙහෙයුම් තනතුර දක්වා උසස්වීම් ලැබුවේය.

″ආචාර්ය කැලුම් සේනානායක මහතා විධායක අධ්‍යක්ෂවරයෙකු ලෙස අධ්‍යක්ෂ මණ්ඩලයට එක්වීම සැබවින්ම වැදගත් අවස්ථාවක්. ඔහුගෙන් අපගේ සමාගමටත්, ශ්‍රී ලංකාවේ රක්ෂණ කර්මාන්තයටත් ලැබෙන සේවාව අතිශය ප්‍රශංසනීයයි. ඔහු ලබාදෙන උපායමාර්ගික මඟපෙන්වීම තුළින් දැවැන්ත ජයග්‍රහණ කරා සමාගම මෙහෙයවීමට අපට හැකිවනු ඇත″, යනුවෙන් ආර්පිකෝ රක්ෂණ සමාගමේ සභාපති රමල් ජාසිංහ මහතා ප්‍රකාශ කළේය.

″ආර්පිකෝ රක්ෂණ සමාගම වැනි ප්‍රමුඛ ආයතනයක අධ්‍යක්ෂ මණ්ඩලයට පත්වීමට හැකිවීම මා ලද ගෞරවයක්. අභියෝගාත්මක පරිසරයක වුව ද ඉතා ශක්තිමත් අනාගත සැලසුම් අප සතුයි″, යනුවෙන් ආචාර්ය කැලුම් සේනානායක මහතා පැවසුවේය.

සිය වෘත්තීය ජීවිතය තුළ Munich Re, Hannover Re සහ Reinsurance Group of America (RGA) වැනි ගෝලීය ප්‍රතිරක්ෂණ සමාගම් සමඟ ද ශක්තිමත් සබඳතා ගොඩනඟාගැනීමට ආචාර්ය සේනානායකට හැකිවිය. දශක කිහිපයක් පුරා නව ව්‍යාපාර ප්‍රාරක්ෂණය, රක්ෂණ ඔප්පු හිමියන්ට සේවා සැලසීම, හිමිකම්, සමූහ ජීවිත රක්ෂණ ප්‍රාරක්ෂණය, ප්‍රතිරක්ෂණය, සබඳතා මධ්‍යස්ථාන, පාරිභෝගික සේවා ඇතුළු විවිධ ක්ෂේත්‍ර ගණනාවක ක්‍රමෝපායික සහ මෙහෙයුම් දැනුමක් ද ඔහු සතු ය.

කොළඹ ආනන්ද විදුහලේ ආදි සිසුවෙකු වන ආචාර්ය සේනානායක, Worldview Institute හි ව්‍යාපාර කළමනාකරණ ඩිප්ලෝමාධාරියෙකු වන අතර ඕස්ට්‍රේලියාවේ University of Western Sydney හි ව්‍යාපාර පරිපාලන පශ්චාත් උපාධිධාරියෙකි. මීට අමතරව, London University of Peace මගින් ඔහුට ව්‍යාපාර පරිපාලනවේදී ආචාර්ය උපාධියක්ද පිරිනමා තිබේ. එක්සත් රාජධානිය, ජර්මනිය, ජපානය, සිංගප්පූරුව, හොංකොං, මැලේසියාව, තායිලන්තය, ඉන්දියාව සහ දකුණු අප්‍රිකාව යන රටවල රක්ෂණ කර්මාන්ත පුහුණුව ද ලබා ඇති ඔහු, තම වෘත්තීය දිවිය තුළ 20,000කට අධික රක්ෂණ වෘත්තිකයින් ගණනක් පුහුණු කර තිබේ.

ආර්පිකෝ රක්ෂණ සමාගම පරිත්‍යාග, සෞඛ්‍ය, කාලීන, සමූහ, ණය රක්ෂණය හා අධ්‍යාපන, ආයෝජන, විශ්‍රාම සහ සහන සැලසුම් වැනි රක්‍ෂණ විසඳුම් රැසක් ඉදිරිපත් කරයි. ශ්‍රී ලංකාවේ දැවැන්තම සහ වඩාත් විවිධාංගීකරණය වූ ව්‍යාපාර සමූහයක්වන වසර 90ක ඉතිහාසයක් ඇති Richard Pieris & Company PLC හි අනුබද්ධිත ආයතනයක් වන ආර්පිකෝ රක්ෂණ සමාගම, ශ්‍රී ලංකා රක්ෂණ නියාමන කොමිෂන් සභාව විසින් නියාමනය කරනු ලබන මෙරට ප්‍රධානම ජීවිත රක්‍ෂණකරුවන් අතර සිටින ගෞරවනීය ජීවිත රක්‍ෂණ සමාගමකි.