ඕෂල හේරත්ගේ පියා බොරැල්ල පල්ලියට බෝම්බ තබා ඇත්තේ 1970 ගණන්වල සිය විවාහයට උදෑසන දේව මෙහෙයක් නොදුන් නිසා ය. නාරාහේන්පිට රෝහලේ බෝම්බයක් තබා ඇත්තේ සිය බිරිඳට ප්‍රතිකාර කළ එම රෝහලට කෘතගුණ සලකා ප්‍රසිද්ධියක් ලබා දීමට ය.
විශ්‍රාමික වෛද්‍යවරයෙකු බව කියන මෙම පුද්ගලයා පසුගිය ජනාධිපතිවරණයේ දී අනුර දිසානායක සහ සජිත් ප්‍රේමදාස වෙනුවෙන් පෙනී සිටි ඕෂල හේරත්ගේ පියා ය. හිටපු ජනාධිපති මෛත්‍රීපාල සිරිසේනගේ සමාජමාධ්‍ය උපදේශක ලෙස කටයුතු කළේ ද ඕෂලය.
පොලිසිය පරික්ෂණ පවත්වන ආකාරය පවා විවේචනය කරමින් මේ බෝම්බ සිද්ධිවල මහ මොළකරු අල්ලා ගන්නැයි මාධ්‍ය කැඳවා යුද ප්‍රකාශ කළ මැල්කම් කාදිනල්තුමා අද නිහඬ ය. දැන් මහ මොළකරු ගැන කිසිවෙකු කතා කරන්නේ නැත. සිරිල් ගාමිණී පියනම ද විපක්ෂය ද නිහඬ ය. සියල්ලට වඩා දරාගත නොහැකි කාදිනල්තුමාගේ නිහඬකමය.
පල්ලියේ මෙන් ම රෝහලේ ද බෝම්බ තබා ඇත්තේ සිය අනුගාමිකයකු බව දැනගත් වහා මාධ්‍ය කැඳවා අදාළ අපරාධකරුගේ ප්‍රකාශය කොන්ඩෙ බැඳපු චීනුන්ට කියන ලෙස ද වහාම ඔහුට උපරිම දඬුවම් ලබා දෙන ලෙස ද කාදිනල්තුමා ඉල්ලා සිටිනු ඇතැයි මම සිතුවෙමි. පොලිසිය දින කිහිපයකින් මහ මොළකරු අත්අඩංගුවට ගැනීම පිළිබඳ සිය ස්තූතිය පළකරනු ඇති බව ය. රජය අපහසුතාවට පත් කිරීමට සිදුකළ මෙම නින්දිත ක්‍රියාව හෙළා දකිනු ඇති බවය. ඕෂලගේ නිවසේ තිබූ හමු වූ ආයුධ සෙල්ලම් බඩු යැයි කළ ප්‍රකාශයට ලුණු ඇඹුල් ඇතිව කාදිනල්තුමා අමතනු ඇති බව ය. එහෙත් දැන් පෙනෙන ආකාරයට කාදිනල්තුමා ද මේ මහ මොළකරුගේ ප්‍රකාශය පිළිගෙන තිබේ. ඕෂලගේ සෙල්ලම් බඩු ප්‍රකාශය ද හිස් මුදුනින් පිළිගෙන ඇත.
ඔහු කටයුතු කර ඇත්තේ කිසිදු දේශපාලන අභිලාෂයකින් නොව සාලිය අශෝකමාලා, ගාමිණි චිත්‍රා, ජැක් රෝස් වැනි ප්‍රේම කතාවල එන ප්‍රේමවන්තයින් මෙනි. මේ වියපත් පෙම්වතා සිය ප්‍රේමය වෙනුවෙන් පල්ලියේ ද රෝහලේ ද විශාල මුදලක් වැය කර බෝම්බ තබා තිබේ. ඒ පිවිතුරු සැලමුතු ප්‍රේමය වෙනුවෙන් මිස රටේ ජාතික ආරක්ෂාව තහවුරු වී නැතැයි ද යහපාලනාණ්ඩුව කාලයේ මෙන් ම රට පුරා බෝම්බ පුපුරන්නේ යැයි ද මතයක් සමාජගත කිරීමට නොවේ. කොටින් ම ආණ්ඩුව අපහසුතාවට පත් කිරීමට නොවේ. ඔහුගේ දේශපාලන වපසරිය අනුව ද මෙය තහවුරු කරගත හැකි ය. ඕෂලගේ පුතා පිස්ටල්, කඩු, තුවක්කුවලින් සෙල්ලම් කරන්නෙකි.
එහෙත් සහරාන් සිය පවුල ම විනාශ කර ගෙන මරා ගෙන මැරුණේ ද ජවිපෙ ජාතික ලැයිස්තුවේ සිටි කෝටිපති කුළුබඩු ව්‍යාපාරික ඊබ්‍රාහිම් නානා සහෝදරයා සිය දරු පවුල ම බිලි දුන්නේ ද ඊළඟ මැතිවරණයේ දී ගෝඨාභය රාජපක්ෂ දිනවීමට මිස මුස්ලිම් අන්තවාදී ප්‍රහාරයක් ලෙස නොවන බව කාදිනල්තුමාට හොඳට ම විශ්වාසය. කූරගල බෞද්ධ උරුමය රැකගත් ගෝඨාභය වෙනුවෙන් සහරාන්ලා මරාගෙන මැරෙන විට ඕෂල හේරත්ගේ තාත්තා සිය ප්‍රේමය වෙනුවෙන් රට පුරා බෝම්බ තැබූ බව අප ද පිළිගෙන කොණ්ඩෙ බැඳපු චීනුන් වන්නට සිතට ගමු.
කෙසේ වුව ද මේ බෝම්බ දෙකෙන් එකක් හෝ පුපුරා ගියේ නම්, මහ මොළකරු දින කිහිපයකින් අත්අඩංගුවට පත් නොවූයේ නම් කාදිනල්තුමා රටට කියනු ඇත්තේ කුමක් ද? රටේ ප්‍රශ්න යට ගැසීමට මෙම බෝම්බ පුපුරුවන බව ය. ජාතිවාදය වපුරා රට පාලනය කිරීමට බෝම්බ පුපුරුවන බව ය. බෝම්බ පුපුරුවා ගෙන බලයට පැමිණ බෝම්බ මතින් රට පාලනය කරන බවය. පාස්කු බෝම්බයේ මහ මොළකරු මෙන් ම මේ බෝම්බවල ද මහ මොළකරු එකම අයකු බව ය.
නාමල් උඩලමත්ත
No comments:
Post a Comment