இலங்கை மற்றும் இந்திய அணிகளுக்கு இடையிலான இரண்டாவது T20I போட்டி இன்றைய தினம் நடைபெறவுள்ளதாக இலங்கை கிரிக்கெட் சபையின் உத்தியோகபூர்வ டுவிட்டர் தளத்தில் பதிவிடப்பட்டுள்ளது.
இந்திய அணியின் சகலதுறை வீரர் குர்னால் பாண்டியாவுக்கு கொவிட்-19 தொற்று உறுதிசெய்யப்பட்டதையடுத்து, நேற்று நடைபெறவிருந்த இரண்டாவது T20I போட்டி இன்றைய தினத்துக்கு (28) ஒத்திவைக்கப்பட்டது.
>> குர்னாலுக்கு கொவிட்-19; 2வது T20I போட்டி ஒத்திவைப்பு
எனினும், குர்னால் பாண்டியாவுடன் நெருங்கிய தொடர்புடைய 8 வீரர்கள் தனிமைப்படுத்தப்பட்டதுடன், குழாத்தின் அனைவருக்கும் கொவிட்-19 பரிசோதனை மேற்கொள்ளப்படும் என அறிவிக்கப்பட்டது.
அதன்படி, மேற்கொள்ளப்பட்ட கொவிட்-19 பரிசோதனையில் எந்தவொரு வீரருக்கும் கொவிட்-19 தொற்று ஏற்படவில்லை என அறிவிக்கப்பட்டுள்ளது. அதேநேரம், தனிமைப்படுத்தப்பட்டுள்ள 8 வீரர்கள் இன்றைய போட்டியில் விளையாட முடியாது என தெரிவிக்கப்பட்டுள்ளது. எனவே, இந்திய அணியில் பல மாற்றங்கள் இருக்கலாம் என எதிர்பார்க்கப்படுகிறது.
எவ்வாறாயினும், கொவிட்-19 தொற்றுக்கு முகங்கொடுத்துள்ள குர்னால் பாண்டியா, கல்கிஸை பகுதியில் உள்ள ஹோட்டல் ஒன்றுக்கு இடமாற்றப்பட்டு, தனிமைப்படுத்தப்பட்டுள்ளார் என குறிப்பிடப்பட்டுள்ளது. அத்துடன், 7 நாட்கள் தனிமைப்படுத்தலில் கட்டாயம் இருக்கவேண்டிய நிலையில், எதிர்வரும் 30ம் திகதி இவர் இந்திய அணி வீரர்களுடன் நாடு திரும்புவதற்கான வாய்ப்பு இவருக்கு இல்லை எனவும் குறிப்பிடப்பட்டுள்ளது.
குர்னால் பாண்டியாவுக்கு எற்பட்டுள்ள கொவிட்-19 தொற்றானது, அறிகுறிகளை கொண்ட கொவிட்-19 தொற்று எனவும், அவரின் தொண்டை பகுதியில் வலி ஏற்பட்டுள்ளதாகவும் வைத்தியர்கள் சுட்டிக்காட்டியுள்ளனர்.
எவ்வாறாயினும், 2வது T20I போட்டியானது, இன்று இரவு 8 மணிக்கு ஆரம்பமாகும் என தெரிவிக்கப்பட்டுள்ளதுடன், தொடரின் மூன்றாவதும் இறுதியுமான போட்டி நாளைய தினம் (28) நடைபெறும் என தெரிவிக்கப்பட்டுள்ளது.
>> மேலும் பல கிரிக்கெட் செய்திகளை படிக்க <<
