කතා බහ අඩු කර
මොකද හිටි හැටියේ ම
විඩාබර දිනයේ ම
ඇයි ද දැන් තනියෙන් ම
හුඟක් වැඩ ඇති නේද
විභාගය ළඟ නේද
ඉවර වී සුබ දාක
හිනාවෙමු පෙර සේ ම
පරිගණක අතරේ ම
දෑස දැන් රිදිලා ද
ඉලක්කම් මහ ගොඩක
දෑතැඟිලි ගෙවිලා ද
නිදි නොමැති නෙතු වෙතට
පිනි සීත එනවා ද
රස මවුලු නැතුවාට
වෙලාවට කනවා ද
වැහි බිංදු වැඩි දාක
සීත වැඩි වී ඇත්ද
උණු කෝපි කෝප්පය
දෙන්ට කවුරුත් නැද්ද
ස්වර හතත් රස ගේන
පොත් අතර සැඟවී ද
විඩාබර විටෙක වත්
ගීත මුමුණනවා ද
කවි අකුරු දැන් කොහිද
ඒ සිතුම් ගොළු වී ද
මතු කරන් රස හීන
ලියනවා ද යළි දාක
ඉතින් පාළුයි බෝම
නොකියා ඉන්නේ කෝම
කවිය ඇත මගෙ ගාව
ලියන්නම් හැමදාම
මතක සිහි වූ විටෙක
සිනහවක් ගෙන මුවට
ගෙන නෙතින් මෙම කවිය
කියවන්න සිතු සේ ම
හිතට බර වැඩි දාක
තනි ව නොම ගෙන සෝක
පවසන්න, මම තාම
අසනවා හැම දේම
Picture Credit : https://bit.ly/3abDIow