இந்திய அணிக்கு இனிங்ஸ் வெற்றி

195
Ravichandran Ashwin
(AP Photo/Ricardo Mazalan)

ஆன்ட்டிகுவா டெஸ்ட் போட்டியில் மேற்கிந்திய தீவுகள் ஃபாலோ ஆனில் 231 ரன்களுக்குச் சுருண்டது. இதனையடுத்து இனிங்ஸ் மற்றும் 92 ஓட்டங்கள் வித்தியாசத்தில் இந்தியா அபார வெற்றி பெற்றது.

ரவிச்சந்திரன் அஸ்வின் 83 ஓட்டங்களுக்கு 7 விக்கெட்டுகளைக் கைப்பற்றினார். இந்த இனிங்ஸ் வெற்றி கரீபியனில் முதலாவது, ஆசியாவுக்கு வெளியே இந்திய அணியின் மிகப்பெரிய வெற்றியும் இதுவே. சதம் மற்றும் 5 விக்கட்டுகள் அல்லது அதற்கும் அதிகமான விக்கட்டுகள் என்று ஒரே டெஸ்ட் போட்டியில் அஸ்வின் அசத்துவது 2ஆவது முறையாகும்.

உணவு இடைவேளைக்குப் பிறகு 8 விக்கட்டுகள் வேண்டிய நிலையில், அஸ்வினின் பந்துகளில் திடீர் மாற்றம் ஏற்பட்டது. பிளைட் செய்யப்பட்ட பந்துகள் பிட்ச் ஆகும் இடம் பற்றிய எதிர்பார்ப்பை அஸ்வின் மாற்றிக் கொண்டேயிருந்தார்.

நேற்று காலை உமேஷ் யாதவ் ஒரு அருமையான பந்து வீச்சு ஸ்பெல்லில் டேரன் பிராவோவை முதல் ஓவரில் வீழ்த்தினார். முதல் இனிங்ஸ் போலவே ஆஃப் ஸ்டம்ப் வெளியே பந்தைத் தொட்டார் கெட்டார்.

மர்லன் சாமுவேல்ஸுக்கு மொகமது ஷமி கிளவ் உயர பந்தை வீச விருத்திமான் சஹாவிம் இடது புறம் தாழ்வான கேட்ச் ஆனது. ஏகப்பட்ட ரீப்ளேக்கள், கோணங்களுக்குப் பிறகு சந்தேகத்தின் பலன் சாமுவேல்ஸுக்கு அளிக்கப்பட்டது, இந்திய வீரர்கள் உண்மையில் இதில் வெறுப்படைந்தனர். பால்கனியிலிருந்து அவுட் என்று கூறிய பயிற்சியாளர் அனில் கும்ப்ளேவுக்கும் ஏமாற்றம். கோஹ்லி நடுவர் இயன் கோல்டுடன் காரசாரமாக ஏதோ பேசினார்.

ஏனெனில் அதன் பிறகு சந்திரிகா, சாமுவேல்ஸ் 22 ஓவர்கள் இந்திய அணியை வெறுப்பேற்றினர். குறிப்பாக அவுட் மறுக்கப்பட்ட பிறகு சாமுவேல்ஸ் சில அருமையான கட் ஷாட்களையும், லாஃப்டட் ஷாட்களையும் ஆடினார். மழை வந்தது. இந்த இடைவெளி நேரத்தில் சாமுவேல்ஸ் எப்படி நாட் அவுட் என்ற கேள்வியுடன் அனைவரும் ரீப்ளேவில் உட்கார்ந்து விட்டனர்.

இந்த டெஸ்ட் போட்டியில் விக்கட் எடுக்காத ஒரே முக்கிய பந்துவீச்சாளர் அஸ்வினாக இருந்தார். அவர் பந்துகளை எளிதில் கட் ஆட முடிந்தது, சாமுவேல்ஸ் ஒரு பந்தை மேலேறி வந்து ஸ்பின்னுக்கு எதிர்த்திசையில் தூக்கி அடிக்க முடிந்தது. நிச்சயம் இந்த டெஸ்ட் போட்டியில் இந்திய வெற்றி அஸ்வினால் சாத்தியமில்லை என்ற எண்ணம் தலைதூக்கிய போது இடைவேளைக்குப் பிறகு அஸ்வின் தனது பந்து வீச்சின் முழுமையைக் கண்டடைந்தார்.

சாமுவேல்ஸை ஒரு ஓவர் தனது பிளைட்டினால் ஆட்டிப்படைத்தார். சந்திரிக்காவுக்கு ஆஃப்வாலி போன்ற ஒரு பந்தை வீசினார், ஆனால் அது ஆஃப்வாலி அல்ல, பிளைட்டின் மூலம் பந்து பிட்ச் ஆகும் இடம் பற்றிய பேட்ஸ்மென்களிடம் ஊகத்தை ஏற்படுத்தி ஏமாற்றினார் அஸ்வின். சந்திரிக்கா அப்படிப்பட்ட பந்து ஒன்றில்தன் சஹாவிடம் பிடிகொடுத்து வெளியேறினார்.

பிளாக்வுட் 2வது இனிங்ஸிலும் டக் அவுட் ஆனார். அஸ்வின் இவரையும் பிளைட்டில் ஏமாற்றினார், பந்து ஆஃப் பிரேக் ஆனது ஆனால் டிரைவ் ஆடும் லெந்த் அல்ல இதனால் ஷார்ட் மிட்விக்கெட்டில் பிடிகொடுத்து ஆட்டம் இழந்தார்.

சாமுவேல்ஸ் 85 பந்துகளில் 11 பவுண்டரியுடன் 50 ஓட்டங்கள் எடுத்த நிலையில் அஸ்வின் பந்து ஒன்று எதிர்திசையில் திரும்பியது ஆனால் நன்றாகத் திரும்பவில்லை சற்றே நேர் ஆக சாமுவேல்ஸ் மட்டையைக் கடந்து பவுல்டு ஆனது. இத்தகைய கிளாசிக் ஸ்பின் பந்து வீச்சை எதிர்கொள்ள மே..தீவுகள் பேட்டிங் வரிசையில் அனுபவம் போதவில்லை என்றே கூற வேண்டும். ராஸ்டன் சேஸ் ஷார்ட் லெக்கில் கேட்ச் கொடுத்து வெளியேறினார்.

முதல் இன்னிங்ஸில் நன்றாக ஆடி அரைச்சதம் எடுத்து நாட் அவுட்டாகத் திகழ்ந்த டவ்ரிச்சை அமித் மிஸ்ரா எல்.பி. செய்து வெளியேற்றினார். ஜேசன் ஹோல்டருக்கு அஸ்வினின் பந்து மிக அருமையானது, சிறந்த பேட்ஸ்மென்கள் ஆடினாலும் கூட பவுல்டுதான் ஆக முடியும். ஒரு ஆஃப் பிரேக் பந்தை எதிர்பார்த்து டிரைவுக்கு முயன்றார் ஹோல்டர் ஆனால் பந்து சற்றே உள்முகமாகத் திரும்பி பேட், பேட்  இடைவேளியில் லெக் ஸ்டம்பை பதம் பார்த்தது. அஸ்வின் ஆசியாவுக்கு வெளியே முதல் முறையாக 5 விக்கெட்டுகளைக் கைப்பற்றினார். 132/8 என்ற நிலையில் கார்லோஸ் பிராத்வெய்ட் (51), தேவேந்திர பிஷூ (45) வெறுப்பேற்றி ஸ்கோரை 227 ரன்களுக்குக் கொண்டு சென்றனர். கடைசியில் பிஷூ, கேப்ரியலை அஸ்வின் வீழ்த்தி 25 ஓவர்கள் 7 மெய்டன்கள் 83 ரன்கள் கொடுத்து 7 விக்கெட்டுகளைக் கைப்பற்றினார். மே..தீவுகளின் போராட்டம் 78-வது ஓவரில் 231 ரன்களுடன் முடிவுக்கு வந்தது. போட்டியின்  ஆட்ட நாயகனாக அஸ்வின் தெரிவு செய்யப்பட்டார்.

போட்டியின் சுருக்கம்

இந்தியா 566/8d
விராத் கோஹ்லி 200, ரவி அஷ்வின் 113, சீகர் தவான் 84, அமித் மிஷ்ரா 53,
கிரேக் பரத்வைட் 65/3, தேவேந்திர பிஷோ 163/3

மேற்கிந்திய தீவுகள் 243/10
கிரேக் பரத்வைட் 74, ஷேன் டொவ்ரிச் 57*, ஜேசன் ஹோல்டர் 36,
உமேஷ் யாதவ் 41/4, முஹமத் ஷாமி 66/4

மேற்கிந்திய தீவுகள் 231/10 (Follow on)
கார்லோஸ் பரத்வயிட் 51*, மார்லன் சாமுவேல்ஸ 50, தேவேந்திர பிஷோ 45
ரவி அஷ்வின் 83/7

இந்திய அணி ஒரு இன்னிங்ஸ் மற்றும் 92 ஓட்டங்களால் வெற்றி

மேலும் விளையாட்டு செய்திகளுக்கு இங்கே கிளிக் செய்யவும்