Nemo 33 - ලොව ගැඹුරුතම පිහිනුම් තටාකය

බෙල්ජියමේ බ්‍රසල්ස් නගරයේ පිහිටා ඇති Nemo 33 ලොව ගැඹුරුතම පිහිනුම් තටාකය ලෙස සැලකෙනවා. කිමිදුම්කරුවන්ගේ පාරාදීසයක් ලෙස හැඳින්වෙන මෙය සැළසුම් කර ඇත්තේ බෙල්ජියානු ජාතික කිමිදුම් ශූරයෙකු වන ජෝන් බියනාර්ට්ස් විසින්.

ඉහලින් බැලූ කල පෙනුම

උපරිම ගැඹුර මීටර් 34.5ක් (අඩි 113ක්) වන මෙහි ජලය ලීටර් මිලියන  2.78787ක් අන්තර්ගතයි. තවද මෙම තටාකයේ ඇති විශේෂත්වයක් වන්නේ මෙහි ඇති ජලයට ක්ලෝරීන් එක්කර නොතිබීමයි. ඉතා හොඳින් ෆිල්ටර් කරන ලද ජලයෙන් මෙම තටාකය පිරී තිබෙන අතර ජලයේ උෂ්ණත්වය සැමවිටම 30 °C (86 °F) තත්වයේ රඳවා තබා ගැනෙනවා.

අඩි 33ක් ගැඹුරේදී

අඩි 33ක් ගැඹුරේදී විවිධ ගුහා ආකාරයෙන් කල නිර්මාණයක් මෙහි දක්නට ලැබෙන අතර අඩි 113ක ගැඹුරක් කරා දිවෙන වෘත්තාකාර නළය ආරම්භ වන්නේ මෙම මට්ටමේදීයි.

වර්ශ 2004දී ගොඩනංවා ඇති මෙම පිහිනුම් තටාකයේ අරමුණු වී ඇත්තේ කිමිදුම් පුහුණුකරණය හා චිත්‍රපට නිර්මාණ කටයුතු සඳහා යොදාගැනීමටයි. කෙසේ වෙතත් අවුරුදු 12න් ඉහළ සංචාරකයන්ට මෙම තටාකය භාවිතා කිරීමට අවස්ථාව තිබෙන අතර ඒ සඳහා ඔවුන් අවශ්‍ය කරන යෝග්‍යතා මට්ටම් සපුරා තිබිය යුතුයි.